Mat 10 | WSK | STEP | Jesus ko olekem 12 nunga auram se kote taiman se sokel bur memek te nunga karomonko mu se, kuera ikes duap duap te nungurmonko mu nungaram.

Matthew 10

Jesus ko olekem 12 mu nunga nunup

(Mark 3:13-19; Luke 6:12-16)

1 Jesus ko olekem 12 nunga auram se kote taiman se sokel bur memek te nunga karomonko mu se, kuera ikes duap duap te nungurmonko mu nungaram. 2 Se olekem 12 nunga nunup mu iwita: motam motam mu Simon (ko nup bo Peter), se ko uria Andrew. Se Zebedee ko kuriang ilagala James ko uria John ilak. 3 Se Philip, se Bartholomew, se Thomas, se takis tata kari Matthew, se Alphaeus ko kuriang James, se Thaddaeus. 4 Se Simon Zealot. Se Judas Iscariot, mu nu udagi te Jesus kager kari nuguting te beteram. Mu butata.

Jesus ko olekem 12 ura nungaram

(Mark 6:7-13; Luke 9:1-5)

5 Jesus ko olekem 12 namomon ura betemon geragomonko, se nu den imi nunga maonam, “Nina sor saki ko kariimet nunga ningi se, Samaria alo nunga wonong sor bo te me namaralko,” mam. 6 “Mena. Nina Israel kariimet mu nongote la namaralko. Mu awuk, nuna sipsip lage supawasan iwita. ^{▼▼Mat 10:6 Olekem mu Israel alo nongote namomonko: Acts 13:46. Nuna sipsip lage supawaman iwita: Isa 53:6; Jer 50:6-7.}

7 “Se nina namaral mu den imi balalko, ‘Duruk wonong ko kingdom tai pingi aram!’ malko. 8 Buta balu se kariimet kuera ikes karogo mu nunga nunguru se, saki kuesan ale nomotam kui aniso mu nunga maraguwu se, kariimet nungumik laera posara karogo mu nunga nunguru se, saki bur memek nungumik ningi anira mu nunga karo se, lagaralko. Ani marak sokel ningarem sumu mu ipi ningarem, ko diara bo mena. Se nina nunga saongal mu ko koma me talko, am ipi nunga saongalko.

9 “Nina aolak iluwalko mu, manga mel, gold silver se toea agi mu ago me gialko. Ale ninga guang saki se ninga nedeleng tuagu saki agi, se ninga sikir se ninga karar mu me ago gialko tala. Mu awuk, kari ura tauk mu ko koma am tumonko.

11 “Nina wonong biya agi, wonong gotek bo agi ningi kasu nagural, mu nina kari bo, ko munan ningo mu kupal arigal, ale ko kawam te ilak bagaralko. Se kari umutang la ilak baga, tom nina wonong mu beteralko mu asele nu beteralko. 12 Se nina ko kawam ningi kasu nagural, mu giral nongomang lila den nunga maonalko. 13 Se kawam mu ko kariimet nengerak amilmilomon agi mu, nenenga den lila balman mu nongote am anirukko. Bare nengerak me amilmilomon agi mu, nenenga den yawara mu aking peleruk nengete tairukko.

14 “Se kari bo nengerak me amilmilurukko, nenenga den me ikiok, mu ko kawam agi ko wonong mu bita se, gege kupkup nedeleng te aniso mu siwural se wonong mu te kapurukko. 15 Ani nunguningta ninga manorsam, tom Kaem kariimet nunga tuterukko tom te, wonong umutang mu ikup gimonko mu Sodom ko se Gomorrah wonong ko kariimet nunga ikup gimonko mu kiaruk, ale ikup biya nunguningkiri gimonko.

Jesus ko olekem alo ikup duap duap gimonko mu ko den balam

(Mark 13:9-13; Luke 21:12-17)

16 “Ikialko! Ani sipsip iwita ninga diruwusam se kausik diwang mu nunga kusumuri namawasan. Se umutang ko nina ma urer iwita sinar ago bagaralko. Bare aking inanganang biton memek bo me betesan iwitata, nina memek bo me beteralko, munan diram la beteralko.

17 “Ninguru sinar talko! Mu awuk, nuna ninga ilumon ale nengerak den ariga kari nomokete namomon ale ninga isarmonko. Se aking nunga synagogue ningi ninga lilumomonko. 18 Nina ani agowom karosan mu ko, ninga ilumon, ale king se kari supuling bibiya nomokete ninga bangarmon ale ninga isarmonko. Se tom mu te nina aninga dugu duap balal se nuna ikimonko. Se sor saki ko kariimet saki mu nuna karogotala ikimonko. 19 Bare tom nuna ninga ilumon ale ninga isarmon mu nina den aguwaya balalko mu ko me neneman sisirokko. Mu awuk, nina munakaralko tom tai aratuk mu te, den sang ningamin te tairuk mu te la munakaralko. 20 Bare mu nina nengeta ninga den mena. Nenenga Nenet Kaem ko Korang Bur mu nigiring te den bitiruk se balalko.

21 “Se kari saki nongota nunga launuria kager kari nuguting te nunga awumon se nunga momon se kuemonko. Se kuriang nunga nonet alo mu nongota nunga kuriang nungumik te uwutatala betemonko. Se kuriang alo mu betela barasomon ale nongota nunga nunam nonet kager kari nuguting te nunga awumon se kuemonko. 22 Se kariimet suen la mu ani angimik te nina nego ko nongomang magurukko. Bare kari awiriya me nguanguruk, am sail karogo sanamiwuruk nama tom nukum te, mu Kaem nu sangaru taukko. 23 Se wonong bo te ninga bita maguwumon, mu nagural nama wonong bo te aratalko. Ani nunguningta ninga manorsam, nina Israel wonong suen la ningi ura me menawural la, Kari ko Kuriang aking tairukko. ^{▼▼Mat 10:21-25 Kariimet Jesus kowom karosan mu ikup gimonko: Mat 24:9; John 15:18-21. Nuna Jesus nubiring me tumonko: Rev 2:10,17,26.}

24 “Ikia ta ko kari mu noko kausa kari mu ko kualala me bagurukko. Mu nu ko kausa kari ilak wete koma suwanta bagomonko mu terong. Se aking ura kari mu noko kari biya mu ko kualala iwita me bagurukko. Mu nu ko kari biya ilak wete koma suwanta bagomonko mu terong. Nuna digo ko kari gira balman Beelzebul ko ma balman. Se digo mu ko kariimet mu ago me nunga balu maguwumon i? Mena. Mu den memek nunguningkiri mu te tala nunga manarmonkowo! ^{▼▼Mat 10:25 Pharisee alo Jesus ko balman Beelzebul ko balman, se nu ko olekem alo te sinar tamonko den imi nunga manaruwoso.}

Jesus ko olekem alo me nguangomonko balam

(Luke 12:2-9)

26 “Se nina kariimet nunga me nguangaralko! Mel suen la yumura te aniso mu udagi te wetang te aratukko. Mel suen la kari iramurman se aniso mu udagi te kariimet ko ikimonko. 27 Den ani yumura te ninga manorsam, mu wetang te balalko. Se den nina kasiksi te ikiman, mu nina wetang te sanami se biyala balalko.

28 “Nina kariimet me nunga nguangaralko! Mu awuk, nuna ningimik guang la momon se kuerukko terong maman, bare nuna ninga nedera maguwumonko mu me terong. Bare Kaem mu nu kariimet nungumik guang se nodora lilim la tama ningi maguwu sapurukko terong mam. Se nina Kaem ko la nguangaral ale kuring karo tualko. ^{▼▼Mat 10:28 Kaem sokel ago: Heb 10:31; James 4:12.}

29 “Nina ikisan, kariimet manga biling suwanta inanganang gotektek ilagala te am nunga diamonko. Bare bo ta dagulok se nenenga Nenet me ko ikiokko iwita mena. Mu awuk, nu ninguru nunga iki se nunga sinar towoso. 30 Se betela tala, nenenga nemene gawa awilaya nisipiling te aniso mu nu ko iki saposo tala. 31 Buta se nina me nguangaralko! Nina inanganang gotektek mu ninguru nunga kiaman.

32 “Kari awiriya aninga aip kariimet nomoke te baluk, mu ani karogotala noko nup aninga Ait duruk te bagoso mu moke te balikko. 33 Bare awiriya kariimet nomoke te ani buring aisuk, mu ani karogotala aninga Ait duruk te bagoso mu moke te nu abiring tuekko.

Jesus kowom kaora ko mu mel nunguning

(Luke 12:51-53; Luke 14:26-27)

34 “Nina bo la ikial ale ani ali ewerete kager menawurik ale marolila kariimet nungarikko tairem i mal bore ko! Mena! Ani kager menawurikko me tairem, ani batir giem ago tairem. 35 Ani tairem mu te:

‘Kuriang kulak alo nunga nonet arungak kagermonko,
se kuriang itiwik alo nunga nunam alo arungak kagermonko,
se imet iton alo mu nunga nonome alo arungak kagermonko.
36 Se kari kota suwanta ko kawam mu ningi mu ilak betemon kaumonko.’ ^{▼▼Mat 10:35-36 Micah 7:6.}
37 “Awiriya nuam nuet nunga kueso, ale ani ninguru me aga kueso, mu nu aninga bo ko bagurukko me terong. Se awiriya ko namar nanawus nunga kueso ale ani ninguru me aga kueso, mu nu betela aninga bo ko bagurukko me terong tala. 38 Awiriya ko tam kangono giso ale ani agowom me karoso, mu nu aninga bo ko bagurukko me terong. 39 Awiriya kota ko ikia, ko gomang karo tuokko kaeruk, ale ani agowom me karuk, mu nu Kaem ko marak yawara tom suen biya te bagurukko mu me taukko. Bare awiriya kota ko ikia, ko gomang buring tuok ale ani agowom karuk, mu nu Kaem ko marak yawara tom suen biya te bagurukko umutang taukko.

40 “Se nina namaral se kari awiriya gomang ningaruk ale ninga aru tagirok, mu nu ani karogotala gomang aisiso ale aga aru taso. Se awiriya aninga aru taso, mu nu Kari aninga beteram se tairem mu karogotala gomang tuso ale aru taso. 41 Se aking awiriya kari bo ko ikiok mu nu Kaem ko prophet ma baluk, ale gomang tuok ale aru tauk, mu nu prophet alo koma tasan mu nu agotala taukkowo. Se awiriya kari bo ko ikiok, mu nu kari diram ma baluk ale gomang tuok ale aru tauk, mu kariimet diram alo koma tasan mu nu agotala taukko tala. 42 Se kari bo, aninga ura kari bo nup mena wore arigok ale baluk, ‘Imi Jesus ko ura kari’ mauk, ale mu ko sanguk ale yu agi tuok, mu ani nunguningta ninga manorsam, kari mu ko koma ningo taukko tala.”